शीर्षक: किम जोङ उनको उपस्थितिमा उत्तर कोरियाद्वारा उन्नत क्षेप्यास्त्र परीक्षण

काठमाडौं । किम जोङ उनको प्रत्यक्ष उपस्थितिमा उत्तर कोरियाले झुप्पा बम जडित उन्नत रणनीतिक क्षेप्यास्त्रको सफल परीक्षण गरेको जनाएको छ।

राज्य सञ्चालित सञ्चार माध्यमले जनाएको अनुसार आइतबार गरिएको परीक्षणमा ‘हवासोङ्फो–११’ प्रकारका पाँचवटा जमिनबाट जमिनमा प्रहार गर्ने क्षेप्यास्त्र प्रयोग गरिएको थियो। ती क्षेप्यास्त्रहरूले करिब १३६ किलोमिटर टाढाको लक्ष्यमा सटिक प्रहार गरेका थिए।

यस परीक्षणलाई क्षेत्रीय सुरक्षाका दृष्टिले चासोका साथ हेरिएको छ। जापान र दक्षिण कोरियाका अधिकारीहरूले ती क्षेप्यास्त्रहरू सिनपो क्षेत्रबाट प्रहार गरिएको दाबी गर्दै तटीय अवस्थिति कारण पनडुब्बीबाट प्रहार गरिएको हुन सक्ने आशंका व्यक्त गरेका छन्।

उत्तर कोरियाली सञ्चार माध्यमका अनुसार परीक्षणको मुख्य उद्देश्य झुप्पा बम तथा टुक्रा–टुक्रा विस्फोटक सामग्री जडित वारहेडको क्षमता परीक्षण गर्नु थियो। निरीक्षणका क्रममा किमले वैज्ञानिकहरूको प्राविधिक प्रगतिप्रति प्रशंसा गर्दै यस्तो प्रविधिले सेनाको आक्रमण क्षमता अझ सशक्त बनाउने बताएका छन्।

हाल उत्तर कोरियाले अतितीव्र गतिका क्षेप्यास्त्र, बहु–वारहेड परमाणु क्षेप्यास्त्र तथा अत्याधुनिक पनडुब्बी हतियार प्रणाली विकासलाई तीव्रता दिएको छ। विश्लेषकहरूले यसलाई अमेरिका र दक्षिण कोरियाको क्षेप्यास्त्र प्रतिरक्षा प्रणालीलाई चुनौती दिने रणनीतिक कदमका रूपमा व्याख्या गरेका छन्।