सेयर बाँडफाँटमा किर्ते र ठगी आरोप : सन नेपाल लाइफका सीईओ पक्राउ

काठमाडौं । सन नेपाल लाइफ इन्स्योरेन्स कम्पनी लिमिटेड का प्रमुख कार्यकारी अधिकृत (सीईओ) राजकुमार अर्याल पक्राउ परेका छन्। उनलाई नेपाल प्रहरी केन्द्रीय अनुसन्धान ब्युरो ले सेयरसम्बन्धी किर्ते तथा ठगीको आरोपमा नियन्त्रणमा लिएको हो।

प्रहरीका अनुसार कम्पनीले कर्मचारीका लागि छुट्याइएको सेयर बाँडफाँटसम्बन्धी विवरण नियामक निकायमा पेश गर्दा फरक–फरक तथ्यांक प्रस्तुत गरेको पाइएको छ। प्रारम्भिक अनुसन्धानमा आवेदन फाराम तथा कागजातहरूमा समेत असमानता देखिएको बताइएको छ।

नेपाल धितोपत्र बोर्ड ले गरेको प्रारम्भिक अध्ययनपछि तयार गरिएको प्रतिवेदन सीआईबीमा पठाइएको थियो। सो प्रतिवेदनमा कर्मचारी सेयर बाँडफाँटमा झुठा विवरण तयार गरी अर्यालले आफूलाई बढी सेयर राखेको आशंका गरिएको छ।

प्रहरीका अनुसार धितोपत्रसम्बन्धी ऐन, २०६३ को दफा १०० विपरीत कार्य भएको देखिएपछि अनुसन्धान अघि बढाइएको हो। ५१ वर्षीय अर्याललाई काठमाडौं जिल्ला अदालतको अनुमति लिएर पुतलीसडकबाट पक्राउ गरिएको प्रहरीले जनाएको छ।

घटनाबारे थप अनुसन्धान भइरहेको केन्द्रीय अनुसन्धान ब्युरोले जनाएको छ।