लागू औषधसहित चार जना पक्राउ, विभिन्न स्थानबाट ठूलो परिमाण बरामद
काठमाडौं। देशका विभिन्न स्थानमा गरिएको प्रहरीले सञ्चालन गरेको कारबाहीका क्रममा लागू औषधसहित चार जना पक्राउ परेका छन्। काठमाडौं, तनहुँ र भक्तपुरबाट ठूलो परिमाणमा लागू औषध तथा अन्य सामान बरामद गरिएको प्रहरीले जनाएको छ।
काठमाडौं महानगरपालिका–९ भत्केकोपुल क्षेत्रबाट नियन्त्रित लागू औषधसहित ४२ वर्षीय सन्तोष कुँवर पक्राउ परेका छन्। साप्राप्त जानकारी अनुसार, जिल्ला प्रहरी परिसर काठमाडौंको टोलीले उनको डेरा कोठा तलासी गर्दा डाइजेपाम १,०७० एम्पुल, नोर्फिन १,११५ एम्पुल र फेनारगन १,०८० एम्पुल बरामद गरेको हो।
साथै, थप अनुसन्धानका क्रममा गैरीगाउँस्थित उनको अर्को कोठाबाट नगद ३ लाख ११ हजार ५५० रुपैयाँ, विभिन्न देशका मुद्रा तथा सुन जस्तो देखिने गरगहना समेत बरामद गरिएको प्रहरीले जनाएको छ।
त्यसैगरी, तनहुँको आँबुखैरेनी गाउँपालिका–४ बेनिटारबाट लागू औषधसहित दुई जना पक्राउ परेका छन्। पक्राउ पर्नेहरूमा कास्की पोखरा–१२ का ३१ वर्षीय सुरज गुरूङ र काठमाडौं गौशाला बस्ने २३ वर्षीय प्रेम सार्की रहेका छन्। उनीहरूको साथबाट डाइजेपाम ६९ एम्पुल, फेनारगन ६६ एम्पुल र बुप्रेनोर्फिन ६५ एम्पुल बरामद गरिएको छ। उनीहरूलाई भैरहवाबाट पोखरातर्फ आउँदै गरेको बसमा सवार अवस्थामा पक्राउ गरिएको प्रहरीले जनाएको छ।
यसैबीच, भक्तपुर नगरपालिका–८ लिवालीबाट पनि लागू औषधसहित एक जना पक्राउ परेका छन्। पक्राउ पर्नेमा ३७ वर्षीय राजु कर्मचार्य रहेका छन्। उनको साथबाट नोर्फिन ९६ एम्पुल, डाइजेपाम ९८ एम्पुल, फेनारगन ९१ एम्पुल र टेन्टाडोल ५४ ट्याब्लेट बरामद गरिएको छ।
पक्राउ परेका सबैमाथि लागू औषध सम्बन्धी मुद्दामा आवश्यक अनुसन्धान भइरहेको प्रहरीले जनाएको छ।
