नयाँ शैक्षिक सत्रअघि नै कर्णालीमा पाठ्यपुस्तक वितरण, ४.६२ लाख थान बिक्री

बाँके। नयाँ शैक्षिक सत्र २०८३ सुरु हुनुअघि नै कर्णाली प्रदेशमा पाठ्यपुस्तक वितरण सम्पन्न गरिएको छ। जनक शिक्षा सामग्री केन्द्र लिमिटेडको प्रादेशिक प्रेस नेपालगञ्जले चैत २४ गतेसम्म ४ लाख ६२ हजार २४६ थान पाठ्यपुस्तक बिक्री वितरण गरेको जनाएको छ।

प्रादेशिक प्रेस नेपालगञ्जका प्रमुख रुद्र खनालका अनुसार कार्यालयमार्फत कर्णालीका हुम्ला, डोल्पा, रुकुमपश्चिम, जाजरकोट र सल्यान जिल्लामा पाठ्यपुस्तक पठाइएको छ।

यससँगै लुम्बिनी प्रदेशका रुकुमपूर्व, रोल्पा, दाङ, बर्दिया र बाँके जिल्लामा पनि पाठ्यपुस्तक वितरण गरिएको छ। दुर्गम क्षेत्रमा समयमै पुस्तक पुर्‍याउने लक्ष्यअनुसार वितरण कार्य अघि बढाइएको जनाइएको छ।